Umaprem Netralay ke Nishulk Eye Camp mein 82 Patients ki Hui Jaanch
Varanasi: Umaprem Netralay ki Bada Lalpur branch dwara ayojit nishulk eye checkup aur cataract consultation camp ka safal aayojan kiya gaya. Is camp ka labh kul 82 patients ne uthaya.
Camp ke dauran eye specialists ne patients ki aankhon ki detailed jaanch ki aur unhe unki samasya ke anusaar zaroori salah di. Patients ke liye free eye consultation, vision test, spectacle power check, slit-lamp examination, fundus examination aur retina screening jaise advanced tests ki suvidha uplabdh karai gayi.
Jaanch ke dauran kai patients mein cataract ki samasya pahchani gayi. In patients ko modern Alcon Phaco Technology se hone wali cataract surgery ki prakriya aur uske faydon ke baare mein jaankari di gayi. Saath hi zaroori investigations par special discount bhi diya gaya.
Senior Eye Specialist Dr. Arun Kumar Gupta, Dr. Deepit Singh aur Dr. Dinkar ne patients ka parikshan kar unhe uchit treatment ke baare mein margdarshan diya.
Umaprem Netralay management ke anusaar is tarah ke health camps ka uddeshya samaj ke har varg tak quality eye care services pahunchana aur logon ko aankhon ki sehat ke prati jagruk banana hai.